Mat 21 | KUE | STEP | Yesus disaipelma wagle bogl Jerusalem kamun mangigl undre, ana ye ende Betfasi kamun Olip Muglo igle wingo, Yesus disaipelma suwo keunde diende,

Matthew 21

Yesus king mereyegl ende Jerusalem suna ongwa

(Mak 11:1-11 te Luk 19:28-40 te Jon 12:12-19)

1 Yesus disaipelma wagle bogl Jerusalem kamun mangigl undre, ana ye ende Betfasi kamun Olip Muglo igle wingo, Yesus disaipelma suwo keunde diende, 2 ye kongun erambirere mere ditongwa, “Ene yungu epigl nongagle yomara iro pindre ana ene enambrere pi kanbir bugla-dongi mam ta nangigle bogl kane kogl endingwa eglire pai miurka i suwo-akiye kane poko i yu na moglmara wiro. 3 Ana yomba ta ka kanekane ditembi, ene yombamo i diteiro, “Yaglkande kongunmo ta pangwa ertre aglke tambre te ikine endinambuka.”

4 Taragl plau dungwa i propet ta okuna ka dumere mere paiyungwa:

5 “Saion yagl ambu diteyo,

‘Kaniyo, ene kingno
meglmara ungwa.
Ye yomba yoko kangiye
paikrukwa mere ere, ana
bugla-dongi bolamugl ausi
moglkwa. Ana ye bugla-dongi
nangigle ta moko bolamugl
amedi mogl endungwa.’” ^{▼▼21:5Sekaraia 9:9}
6 Ana disaipelmo suwo pindre, Yesus taragl okuna kana eriro ditomere mere ikra eurika. 7 Ye dongi mam ya nangigle bogl i yundre ana ye gatno suna kande olto gugl bugla-dongi mokono mina yembriko, ana Yesus dongi nangigle mina moko bolamugl amedi moglkwa. 8 Ana yomba merkinde ye gatno suna kande olto gugl konbauna ake waidi yei engwa. Te tau endi yaundongo bukondi, ana konbauna kugl ake waidi yei engwa. 9 Yomba merkinde Yesus omara okuna eingwa ye ya te yomba tau mokomugl wingwa, ana ye mambuno ere mangre kaglkadi yegl dingwa,

“Devit Wam dembiye
siteiyo!” “God erewakai
ere tenambuka, ye Yaglkande
kangiye mina ungwa!”
“God dembiyesi mitna imbo kaima endiyo!” ^{▼▼21:9Buk Song 118:26}
10 Enge igle Yesus ende Jerusalem suna ongo ana siti igle yomba prapra toro kan ana krapogl dingwa, “Yomba i irane?”

11 Ana yomba merkinde yegl dingwa, “I Yesus ye propet Galili dumo kande, Nasaret kamun nem ungwa.”

God holi yungumo mina yomba taragl topo eremeglko Yesus simenda endungwa

(Mak 11:15-19 te Luk 19:45-48 te Jon 2:13-22)

12 God holi yungumo mina Yesus ende yungugl pindre ana yomba prapra taragl topo ere-ikine ikine ende meglkwa simenda endungwa. Ana ye yomba moni topo ere imboriya ende botno i ya te amedi mogl kua yumugl moni bogl ingwa endi egle i prapra kindaginde yene ake yakete sitoindi endungwa. ^{▼▼21:12Yomba eremogl God holi yungumo mina sunakra taragl ta topo eramnedi pirimbi ana God holi yungumo i ye monimo mina topo eraglkwa. Rom ya Grik monino mina ta topo erekraglkwa. Ana kua ya taragl tau yomba topo erikwa i ofa ere God tenaglkwa.} 13 Ana ye ditongwa, “Kamambuno pepa mina muno beglko pangwa, ‘Na yunguna i kamange eraglkwa yungu we dinaglkwa.’ ^{▼▼21:13Aisaia 56:7} Ba ene erikwa i ‘kunogl yomba taragl ipi kombuglo mur teke yeimere’ ^{▼▼21:13Jeremaia 7:11} yeglmere erikwa.”

14 Ana ongumutno mim orkwa ya te mau singwa yomba God holi yungumo kande Yesus moglmara yungugl wingo, ana ye kindeno prapra erewakai eretongwa. 15 Ba enge igle pris kande wagle ya ta lo beke teingwa yomba Yesus taragl wakai orkwa i kandre deno kumbrikwa, ana gak kembra God holi yungumo yungugl kaglkane erikwa, “Devit Wam dembiye siteiyo” dingo ana yomba kande wagle kinde pirkwa.

16 Ana ye krapogl Yesus teingwa, “Ene gak kembra ka dingwa i pitno?”

Ana Yesus yegl di ikine ende tongwa, “Owo, ene kamambuno pepa mina pangwa i kerekrimo?

“‘Gak kembra ya,
kuglambu ye drano mina
ene dembin si tenaglkwa.’” ^{▼▼21:16Buk Song 8:2}
17 Yesus eremogl yomba ya te siti i kindekondo ende menda pi ana Betani kamun igle enduwer mogl pangwa.

Endi kogla mongo koglkrukwa kamo

(Mak 11:12-14 te 20-24)

18 Tangina kana Yesus ende ikine siti enagledi pindre, konbauna bange kindan goglkwa. 19 Ye endi kogla endiye ta konbauna bina pango kandre ana magl ongwa, ba mongo ta kogl paikrukwa, yaundo keunde pangwa. Ana ye yegl di endimo i tongwa, “Ene mongo aglketa koglkratnga!” Ana oglandi kaima endimo kogla i gigle goglkwa.

20 Ana disaipelma wagle i kandre nangino kogl krapeglkwa, “Srambre ere endi kogla i oglandi kaima gigle goglme?”

21 Yesus di ikine ende tongwa, “Na kaima ene diteinga, ene pirngi dindre ana ene nomano suwo yeikrimbi, na endi kogla endiye mina erika kanigwa yeglmere ene eraglkwa, ba i keunde tamanga. Ene ombugl makan muglo i ditenaglkwa, ‘Enene ukandi ende mundi nigl po dimbi,’ i pra enambuka. 22 Ene pirngi dindre kamange erimbi ana taragl ta inamunedi kraporaglkwa i pra inaglkwa.”

Yesus kangiye kande ira tomedi krapeglkwa

(Mak 11:27-33 te Luk 20:1-8)

23 Yesus ende ikine God holi yungumo mina suna undre, ana ka bekete moglko, pris kande wagle ya te Israel mina ende okuna eingwa yomba kande tau ye moglmara wu krapeglkwa, “Ene sragl mina yombuglo gigledi indre kongun i etne? Ene kongun yegl ira ero ditome?”

24 Yesus di ikine endungwa, “Na ama ka kra suwarata pogl ene tenaglka, ana ene mongo dipogl narimbi kade, na sragl yombuglo gigledi indre kongun erika i ene dipogl tenaglka. 25 Jon yomba baptais eretongwa yombuglo i aglokra indre baptais eretome? I God mina umo mo yomba mina ume?”

Ana ye yene mambuno bogl di ikine ikine ende pirkwa, “Nono sragl we dinamune? God mina ume dumuno, ye yegl di norambuka, ana ene sraglpre Jon pirngi dikrime? 26 Ba nono yomba mina ume dumuno, nono yomba kundutno gounga sraglpre yomba prapra pirkwa Jon ye propet ta moglkwa.”

27 Yeglpre ye di ikine ende Yesus ditengwa, “No ta pirkunga.”

Ana Yesus ditongwa, “Na ira kongun i erondi narko erika i ene ama ta ditekraglka.

Yagl ta wam suwo eurere Yesus ka di simboglkwa

28 “Ene sragl wedi pirm? Yagl ta wam suwo miurka. Ana ye wam komuno moglmara pindre ditongwa, ‘Wana, ene erme pi wain togl mina suna kongun ero.’

29 Ana wam di ikine endungwa, ‘Na pikraglka,’ ba okuwo ye nomane yake tendre, ana ongwa.

30 “Ana nem pi wam ta ka ikra keunde ditongo, ana wam di ikine ende tongwa, ‘Owo, Nina na pi eraglka,’ ba ye pikrukwa.

31 “Gakmo suwo i, ira nem dumere orme?”

Ye dingwa, “Gak komuno.”

Ana Yesus ye ditongwa, “Na kaima ene diteinga, takis ingwa ya te nangino kunogl gundingwa yomba ye ene ake okuwo ende, ye okuna kana ende God kingdomo mina suna eingwa. 32 Sraglpre, Jon ende ene meglmara undre konbauna du-yene inaglkwa pre ombuno ditongwa, ana ene ye pre pirngi dikrikwa. Ba takis ingwa ya te monguglo gua erikwa yomba ye pirngi diteingwa. I ene pirkan erikwa, ba ene nomano yakete ana ye wedi pirngi dikrikwa.

Kongun yomba kinde wain togl sugl meglkwa kamo

(Mak 12:1-12 te Luk 20:9-19)

33 “Ka ta diboglmbo ene piryo. Enge ta makan nem eremogl wain ereyagl ana togl ere winambodi kondo, wain nuglo dukunaglkwa maugl ta persire ana sugl moraglkwa pre yungu ta keingwa. ^{▼▼21:33Wain togl kamo iwe, Aisaia 5:1-2, mina pamere Yesus dungwa. Kamo i God embriye mambuno ere Israel yomba tomere di simboglkwa. Kamo di simbogl dungwa i mambuno yegl, kongun ere yaglkwa yagle, God. Te wain togl, i Israel yomba.} Ana ye wain toglmo, kongun yomba tau sugl mogl nariyo ditendre ana ye ende kamun eglke ta ongwa. 34 Wain uraglkwa enge magl ungo, ye kongunmo yomba di wain sugl yomba meglmara endungwa i ye wainmo mongo tau gande imakaisi tenaglkwa pre.

35 “Ana wain togl sugl meglkwa yomba ye kongun yomba diendungo wingwa akegidi mogltre ana ta eresindre, ta sigogl, ana ta kombuglo singwa. 36 Aglke kordagl ye kongun yomba tau diendungwa, komnaiye kurita eingwa ba okuwo merkinde eingwa. Ana wain togl sugl yomba komnaiye eingwa eretemere yegl okuwo eingwa ama kuno yegl ereteingwa. 37 Ana okuwo kaima yene wam di ye meglmara suna ende yegl dungwa, ‘Na pirka na Wana i wakai kanaglkwa.’

38 “Ba enge i sugl yomba ye wam kaima kandre ye yene di ikine ikine ende pirkwa, ‘I wain nemyagl wam ungwa. Ende wiyo. Nono ye sigogl ana ye wainmo togl i nono inamga.’ 39 Yeglpre ye wam akegidi mogl wain togl mina gundo piyasi menda ende, ana ye sigeglkwa.

40 “Yegl erikwa pre wain togl nemyagl unambuka enge, ye sragl ere kongun sugl yomba i tenambe?”

41 Ye di ikine ende teingwa, “Sugl yomba kinde ye erekinde erete, sigogltre, ana wain togl i sugl yomba tau tenan, ye engemo pamere kuno ere wain mongo uro tenaglkwa.”

42 Yesus ditongwa, “Ene kamambuno mina ka suna okuna beglko pangwa i kere pirkrimo?

“‘Yungu keingwa yomba
kombuglo i kinde yomedi
plendi menda endingwa, ba
kombuglo i yungu uglomugl
kauglange giglendi pangwa,
i Yaglkande ye yene orkwa.
Ana taragl i no ongumutno
mina wakai kaima pango kamga.’ ^{▼▼21:42Buk Song 118:22, 23}
43 “Yeglpre, na ene diteinga, God kingdomo ene mina i-eglke ende, ana yomba yungu ombuno ta tenan ye mongo pamere wakai koraglkwa. 44 Ana yomba ta yange kombuglo i mina bolamugl sinan ye ama bogl deruwagl baruwagl erambuka. Ba kombuglo i yange yomba ta mina sinan, yombamo i deruwagl kaima ere wu kungane enambuka.” ^{▼▼21:44Erme pirpogl singwa yomba tau eremogl ka i Matyu yene muno boglkrukwa. Ba okuwo yomba ta boglme dingwa. Luk 20:18 mina kano.}

45 Pris kande ya Parisi wagle Yesus ka di simbogl dungwa i pirkwa enge ana ye no pre dumedi pirkwa. 46 Yeglpre ye konbauna ta doko indre kane sinamnedi erikwa. Ba ye yomba merkinde kundutno geglkwa. Sraglpre, yomba pirkwa Yesus propet ta moglkwa.